PISA - Rannsókn

PISA -Rannsóknir
PISA -Rannsóknir

PISA er umfangsmikil alþjóðleg langtímarannsókn á hæfni og getu 15 ára nemenda í lestri, náttúrufræði og stærðfræði. Sá aldur er valinn þar sem hann markar lok almennrar skólagöngu í flestum löndum. PISA er skammstöfun fyrir enska heiti rannsóknarinnar Programme for International Student Assessment og er hún á vegum OECD.

Alls taka yfir 70 þjóðir þátt í rannsókninni, þar af 34 aðildarríki OECD. Menntamálastofnun sér um framkvæmd rannsóknarinnar á Íslandi fyrir hönd mennta- og menningarmálaráðuneytisins. Verkefnisstjóri er Almar M. Halldórsson. Fulltrúi Íslands í alþjóðlegri stjórn verkefnisins er Stefán Baldursson, hjá menntamálaráðuneytinu.

Framkvæmd og markmið
PISA prófið er lagt fyrir á þriggja ára fresti með mismunandi áherslum í hvert sinn. Áherslurnar eru lestur, stærðfræði og náttúrufræði. Það svið sem áhersla er lögð á tekur 2/3 af próftímanum en hin sviðin skipta á milli sín 1/3 próftímans. Með þessari aðferð fæst ekki aðeins samanburður milli landa heldur einnig milli tímabila, nokkuð sem ekki hefur verið gert áður í svo yfirgripsmikilli rannsókn.

Langtímarannsókn
PISA er langtímarannsókn sem staðið hefur yfir frá árinu 1998 og fjölmargir aðilar, þar á meðal sérfræðingar í lestri, stærðfræði og náttúrufræði, hafa komið að undirbúningi og framkvæmd verksins. Ári fyrir hvert próf er haldið forpróf þar sem efni prófs og framkvæmd eru prufukeyrð.

Allir skólar taka þátt
Tveggja klukkustunda langt skriflegt próf er lagt fyrir hvern nemanda og fer fyrirlögn fram í öllum skólum. Prófspurningarnar eru blanda af krossaspurningum og opnum spurningum. Nemendur svara einnig 20-30 mínútna löngum spurningalista þar sem aflað er ýmissa grunnupplýsinga um þá sjálfa. Auk þess svara skólastjórar 30 mínútna spurningalista um ýmsa þætti í skólastarfinu.

Kennirammi
PISA er samstarfsverkefni þátttökuþjóða sem allar taka þátt í stefnumótun og þróun PISA. Færni á hverju og einu sviði, þ.e. í stærðfræði, lesskilningi og náttúrufræði, er skilgreind sem sú færni sem einstaklingurinn þarf á því sviði til að takast á við framtíðina, leysa verkefni sem daglegt líf krefst af honum og nýta þekkingu við raunverulegar aðstæður. 

Var efnið á þessari síðu hjálplegt?