Undanfarnar tvær vikur hafa grunnskólar kynnt niðurstöður samræmdra könnunarprófa fyrir nemendum í 9. og 10. bekk og foreldrum þeirra. Ýmsar spurningar hafa vaknað og hefur Menntamálastofnun veitt leiðbeiningar og brugðist við fyrirspurnum. Eins og vænta mátti þegar miklar breytingar eiga sér stað á námsmati með rafrænni fyrirlögn og nýjum hæfnieinkunnum hafa nokkur vandamál komið upp í framkvæmdinni. Einnig var umfang prófanna mikið í þetta sinn en alls þreyttu um 8.000 nemendur í 9. og 10. bekk prófin.
Að mati Menntamálastofnunar hefur verið leyst úr vandamálum á viðunandi hátt og ættu grunnskólar að geta nýtt sér niðurstöðurnar í samræmi við tilgang prófanna.
Vegna þeirrar gagnrýni sem aftur hefur komið fram á framkvæmd prófanna vill stofnunin taka fram eftirfarandi:
- Við undirbúning prófanna var haft samráð við fjölmarga hópa og aðila innan skólasamfélagsins. Haldnir voru 26 kynningar- og samráðsfundir víða um land og með fjarfundum, gerð voru myndbönd þar sem framkvæmd og niðurstöður voru skýrðar auk kynningarbréfa og tölvupósta. Birtar voru skýringar og lýsingar á prófunum á heimasíðu Menntamálastofnunar og Facebook síðunni „Innleiðing rafrænna prófa“. Að auki var framkvæmdahópur samræmdra könnunarprófa með tengilið í hverjum skóla. Fyrsta kynning á þessum breytingum fór fram á ráðstefnu hjá svæðafélögum Skólastjórafélags Íslands 4. febrúar 2016.
Hér fyrir neðan er listi yfir hluta af þeim aðilum sem Menntamálastofnun hafði samráð við:
- Samband íslenskra sveitarfélaga
- Kennarasamband Íslands
- Skólastjórafélag Íslands
- Félag grunnskólakennara
- Heimili og skóli
- Fræðsluskrifstofur
- Skóla- og frístundasvið Reykjavíkurborgar
- Fulltrúar frá fræðsluskrifstofu Hafnarfjarðarbæjar
- Barnaheill
- Fulltrúar mennta- og menningarmálaráðuneytis
- Prófin eru gerð með hæfniviðmið aðalnámskrár að leiðarljósi. Hæfniviðmiðin eru tengd spurningum sem eru á prófunum. Svör við spurningum á prófinu eru ekki gefin upp að öðru leyti en hvort þau voru rétt eða röng. Hins vegar er birt lýsing á prófspurningum ásamt sýnidæmi. Á heimasíðu Menntamálastofnunar eru skýringar og lýsingar á hvernig niðurstöðurnar birtast.
Fram hefur komið að erfitt kunni að vera að átta sig á muninum á raðeinkunn og hæfnieinkunn. Það er skiljanlegt, sérstaklega þar sem ekki er bein samsvörun milli þessara einkunna. Nánari skýringar á þessum mun er að finna á heimasíðu Menntamálastofnunar.
Í næstu viku mun Menntamálastofnun birta upplýsingar um heildarniðurstöður samræmdra könnunarprófa.